- Euskadiko GGKEen Koordinakundeak «Gazako genozidioa sostengatzen, laguntzen edo babesten duten» enpresekiko harremanak eten ditzatela eskatu die euskal administrazio publikoei.
- Eragin politikoko lanaren bidez, euskal GGKEak ekimenak eta akordioak sustatzen ari dira Eusko Legebiltzarrean, batzar nagusietan eta udal nagusietan.
- Donostian akordio aitzindari bat lortu ondoren, Palestinako egoerari aurre egiteko «balizko ekintzak» eztabaidatu ditu gaur Gasteizko Udalak. Eta gaia ostegunean iritsiko da Eusko Legebiltzarrera.
Irailaren 23an, Donostiako Udalak Israelekin hautsi zuen. Zehazki, amaiera eman zion «gaur egun edo etorkizunean dituen harreman instituzional orori Israelgo Gobernuarekin eta genozidioa edo hori ahalbidetzen duten politikak babesten edo legitimatzen dituen edozein arloko erakunde publiko edo pribaturekin (kirola, ekonomia, akademikoa, kulturala edo bestelakoa)».
Adierazpen instituzionala Podemos udal taldeak eskatuta eztabaidatu zen, baina, egun batzuk lehenago, Euskadiko GGKEen Koordinakundeko ordezkariek adierazpen bat egiteko eskaera bat aurkeztu zuten Donostiako Udaleko Lankidetza Kontseiluan.
Sarraskiaren aurkako garaipen aitzindari horren ostean, Koordinakundea antzeko ekintzak sustatzen ari da EAEko zazpi erakunde nagusietan, administrazio publikoek «harremanak eten ditzaten Gazako genozidioa eta Israelek Palestinan nazioarteko zuzenbidea urratzea sostengatzen, laguntzen edo babesten duten enpresekin».
Eragin politikoko lanaren bidez, Araba, Bizkaia eta Gipuzkoako 84 GGKE biltzen dituen Koordinakundeak adierazpen instituzionalen, mozioen eta legez besteko proposamenen ereduak aurkeztu dizkie talde politikoei Donostia, Bilbo eta Gasteizko udaletan, hiru batzar nagusietan, eta baita Eusko Legebiltzarrean ere.
Hurrengo urratsak: Gasteiz eta Eusko Legebiltzarra
Astearte honetan, urriaren 21ean, eztabaida Gasteizko Udaleko Euskara, Kultura, Hezkuntza, Kirola, Osasuna eta Lankidetza Batzordera iritsiko da. Izan ere, «Gazako egoerari eta erakunde gisa gauza daitezkeen ekintzei» buruz joan den urriaren 13an Gasteizko Udaleko Lankidetza Elkarguneak eskatutako txanda herrikoia dago gaurko gai-zerrendan.
Eguerdiko 12:00etan, Elkargunean parte hartzen duten hainbat erakundetako ordezkariek hitza hartu dute, udal talde politikoei eskatzeko adierazpen proposamen bat eraman dezaten udalbatzarrera. Ekimenak aurrera eginez gero, Arabako hiriburuak bat egingo luke Israelen aurkako nazioarteko zentsurarekin, Gazako palestinarren aurkako genozidioagatik.
Elkargunearen proposamenak salatzen ditu «Israelgo Estatuak Palestinako herriaren aurka egindako gizateriaren aurkako krimenak», eta Gasteizko Udalari «gaiaren inguruan jarrera har dezala» eskatu dio.
Testuan gogorarazi dutenez, udalbatzak genozidioa gaitzesteko adierazpen instituzionala onartu zuen 2024ko uztailean. Hala ere, ohartarazi dutenez, «Nazioarteko Zuzenbidearen urraketaren dimentsioek eta jarraitutasunak euskal erakundeen aldetik irmotasun handiagoz erantzutera behartzen dute». Gainera, uste dute Gazako gosetearen aurkako laguntzak (adibidez, Larrialdietarako Arabako Funtsak uztailean onartutakoa) ezin direla kontraesanean jarri «genozidioa ekonomikoki mantentzeko eta zuritzeko erabiltzen diren erakundeekiko lankidetzarekin».
Donostian bezala, adierazpen proposamen honek eskatzen du, besteak beste, sinatutako kontratuak berrikustea, Francesca Albanese NBEko Errelatore Bereziak «Genozidioaren Ekonomia» gisa definitu duenaren «laguntzaile» gisa seinalatutako enpresak aurkitzeko; baita kontratu horiek deuseztatzea ere, enpresen «inplikazioa amaitu arte».
Era berean, Gasteizko Udalari eskatu dio «genozidioa aitortzeko»; Israelgo Estatuarekiko «eta harekin lotzen den edozein erakunde eta instituzioekiko» harremanak eteteko; «genozidioa babesten, finantzatzen edo zuritzen duten gizarte, kultura, enpresa, zientzia edo kirol erakundeekiko» lankidetza eteteko; eta nazioarteko legezko betebeharrak betetzeko. Eta azken horren barruan, «berehala etetea Israelgo Gobernuarekiko edozein motatako lankidetza», bai eta «krimen hori egiten lagun dezaketen armen, funtsen edo baliabideen transferentziak» ere.
Bestalde, ostegunean, urriaren 23an, eztabaida Eusko Legebiltzarrera helduko da. Kasu honetan, EH Bildu eta Sumar legebiltzarkide taldeek legez besteko proposamen bat aurkeztuko dute, Israelekiko harremanen amaierari buruzko eztabaidari heltzeko.
Akordiorako deia
«Donostiako Udalean hartutako erabakiak agerian utzi zuen, beste behin ere, antolatutako gizarte zibilak erakundeei presio egiteko duen gaitasunak funtzionatzen duela», balioetsi du Euskadiko GGKEen Koordinakundeko eragin politikoko taldeak. «Espero dugu Gasteizko Udalak eta Eusko Legebiltzarrak gizartearen eskaerak entzutea eta norabide berean aurrera egitea, Israeli presioa eginez, Palestinarekiko nazioarteko elkartasun oldearekin bat eginez, eta Gazako genozidioa amaitzen lagunduz, baita euskal erakundeetatik ere».
«Badakigu ildo horretatik ekimenak egiten ari direla jada, baina Euskadiko eragile politiko guztiei dei egiten diegu ados jar daitezen erabakitasunez aurre egiteko Palestinako herriaren eskubideen urraketa sistematikoei», gaineratu dute. «Ez dugu nahi Euskadik beste alde batera begiratzea, ezta bertako enpresa ehunak nazioarteko estandar oinarrizkoenak albo batera uztea ere».
