- Astelehenetik ostegunera bitartean, NBEren nazioarteko gailurrean izan da Euskadiko GGKEen Koordinakundea, asteburuan Gizarte Zibilaren Foroan parte hartu ondoren.
- Hainbat euskal GGKErekin eta mundu osoko gizarte zibileko 1.500 ordezkari baino gehiagorekin batera, mundu mailako finantza eta ekonomia sistema bidezkoagoa aldarrikatu dugu.
- Nazioarteko gizarte zibiletik balantze gazi-gozoa egiten dugu: finantza sistema global bidezkoago bat lortzeko aukera izan daitekeen arren, Sevillako Konpromisoa ez dator bat munduak behar duen anbizioarekin, eta gizartearen parte-hartzea lausotzen joan da prozesuan zehar.
Hemen irakur dezakezu Estatuko Garapenerako Erakundeen Koordinakundearen adierazpena:
Conferencia de Sevilla: un balance con luces y sombras
Joan den asteburuan, 2025eko ekainaren 28an eta 29an, Garapena Finantzatzeko Nazioarteko IV. Konferentziaren (FfD4) atarian, 1.500 pertsona baino gehiago bildu ziren Sevillan Gizarte Zibilaren Foroan (gailurrak 10.000 baino gehiago bildu zituen). Foroa Konferentziaren programaren parte izan da, aurreko hiru edizioetan bezala, eta funtsezkoa da bertan hitzartuko diren akordioak eta horien izaera demokratikoa bermatzeko.
Euskal lankidetza ere Sevillan egon da, eta Euskadiko GGKEen Koordinakundearen ordezkaritza bat izan da bertan; besteak beste, Irene Molero Gurrutxaga koordinatzaile nagusia eta Nerea Uriarte Goitia (Garabide Elkartea) lehendakari berria.
Bi egunetan zehar, hainbat mahai-inguru egin dira, eta mundu osoko ordezkari sozial eta politikoek konferentziarako funtsezkoak diren gai ugari izan dituzte aztergai. Horrela burutu da gizarte zibilak egindako ekarpen eta eztabaida prozesua, gailur honetan hitzartu den azken akordioari begira: Sevillako Konpromisoa.
Foroak bultzatutako proposamenak baino askoz ere anbizio gutxiago du dokumentu horrek, baina, nolanahi ere, urrats garrantzitsua da nazioarteko finantza sistema bidezkoago baterantz aurrera egiteko, kanpo-zorra, garapenerako nazioarteko lankidetza edo justizia fiskala bezalako gaiei dagokienez.
Ekainaren 29an, igandean, manifestazio handi batekin amaitu zen Foroa, 19:30etik 21:30era bitartean Sevilla hiria zeharkatuz, Cristina Lorategietatik Las Setaseraino, Justizia ekonomiko globala orain! lelopean.
Hemen irakur dezakezu El País – Planeta Futuro hedabidearen artikulua, gizarte zibilak eta nazioarteko zein Espainiako Estatuko GGKEek goi-bileraren aurrean duten jarrerari buruzkoa: GKEek deitoratu dute NBEren Sevillako gailurraren «anbizio eskasa» zorrari eta garapenerako laguntzari dagokienez.
Halaber, ekainaren 27an eta 28an, ostiralean eta larunbatean, Foro Feminista ere egin zen, oraingo honetan Euskadiko GGKEen Koordinakundeak zuzenean parte hartu ez zuen arren. Topaketa horretan, mundu osoko emakumeek ikuspegi feministatik aztertu zituzten Konferentziak planeta osoan dituen inplikazioak.
Gizarte zibila, gailurrean
Garapenerako Finantzaketari buruzko Nazioarteko IV. Konferentzia ekainaren 30etik uztailaren 3ra egin da, astelehenetik ostegunera, Sevillako Kongresu eta Erakusketa Jauregian (FIBES). Nazio Batuen Erakundeak (NBE) hamar urtean behin antolatutako topaketak mundu, estatu zein eskualde mailako erakundeak, finantza zein merkataritza erakundeak, enpresak eta mundu osoko gizarte zibileko entitateak biltzen ditu. Euskal ordezkaritza zabala izan da gailur historiko honetan: Euskadiko GGKEen Koordinakundeaz gain, bertan izan dira hainbat euskal GGKE (UN Etxea, Alboan, Garabide, Oscarte, Haurralde…), euskal alderdi politikoetako zenbait ordezkari, Deustuko Unibertsitatea, Asier Aranbarri Eusko Jaurlaritzako Berrikuntza Sozialaren eta 2030 Agendaren zuzendaria, eta Javier Cortes eLankidetza – Lankidetzarako eta Elkartasunerako Euskal Agentziako zuzendaria, besteak beste.
Egitarau ofizialetik eta osoko bilkuretatik harago, side event edo ekitaldi paralelo ugari izan dira gailurrean. Koordinakundeak ekitaldi horietan parte hartu du. Horien helburua izan da etorkizuneko erronketan sakontzea, besteak beste: garapen iraunkorra, 2030 Agenda, nazioarteko lankidetza… bai eta funtsezkoak diren bestelako gaietan ere, hala nola horren guztiaren finantzaketa, %0,7a betetzea, kanpo-zorra, bakea, ekitatea, giza eskubideak, ingurumenarekiko errespetua… Programa osagarriaren xehetasunak kontsulta ditzakezu hemen.
Ostegunean, lehen aldiz Nazio Batuen garapenerako finantzaketa konferentzien esparruan, gizarte zibilak protesta ekintza bat egin du ekitaldiaren egoitzan. Bertan, dozenaka pertsonak aldarrikatu dute kanpo-zorra kitatzea, justizia ekonomiko globala, aberatsei eta enpresa kutsatzaileei tasak ezartzea, zerbitzu publikoetan eta nazioarteko lankidetzan inbertitzea…, baita Sevillako Konpromisoa haratago joan zitekeen beste gai batzuk ere.
Koordinakundeak eta euskal GGKEetako zein erakundeetako ordezkariek parte hartu duten ekitaldi ofizialen artean, gutxienez bi nabarmendu behar dira:
- Catalyzing Local Action: Advancing the Localization of the SDGs through Innovative Financing. Espazio horretan, United Nations Joint SDG Fund funtsak, Nazio Batuen Local2030 Koalizioak eta Eusko Jaurlaritzak elkarlanean garatutako Bilbao Blueprint plana aurkeztu da, nazioarteko erreferentzia gisa Garapen Jasangarrirako Helburuak tokiko ekintzaren eta alde anitzeko lankidetzaren bidez lokalizatzeko eta bizkortzeko. Asier Aranbarri eta Javier Cortesekin batera, Eva Granados Nazioarteko Lankidetzarako Estatu idazkariak, Annaclaudia Rossbach UN-Habitateko zuzendari exekutiboak eta Sebastien Vauzelle Local2030 Koalizioko arduradunak parte hartu dute.
- Beyond GDP: Rethinking Financing for Sustainable Development, Forus, Futuro en Común, Oxfam International eta Estatuko Koordinakundeak antolatuta, eta Aran Acha UN Etxea elkarteko eta Futuro en Común ekimeneko kideak moderatuta.
Garapenerako Finantzaketari buruzko Nazioarteko IV. Konferentziaren gakoak
Iturria: La Coordinadora – Garapenerako Erakundeen Estatuko Koordinakundea
