Jakinarazpena

Euskadiko GGKEen Koordinakundeak gaitzetsi egiten du Nikaraguako Gobernuak gizarte erakundeak kriminalizatzeko daraman jardunbidea.

2018ko abenduaren 24a. Maiatzean jadanik, Euskadiko Garapenerako GKEen Koordinakundetik erakutsi genuen gure elkartasuna herri nikaraguarrarekiko eta hango Gobernuari eskatu genion errepresioari amaiera emateko eta giza eskubideak errespetatzeko.

Oraingo honetan, gainera, ohartarazi nahi dugu etengabe gertatzen ari direla giza eskubideak defendatzen dituzten GKEen aurka Gobernuak eragiten dituen ekintzak. Azken asteotan, hainbat gizarte erakunderen nortasun juridikoa deuseztatu da, eta haien ondasunak bahitu eta kendu ere egin zaizkie, giza eskubideak defendatze hutsagatik.

Zortzi hilabeteko errepresioaren ondoren, ehunka lagun hilak, milaka zauritu, atzerriratu edo errepresioak kaltetutako pertsonak daudenean, beharrezkoa da gure gobernuek dagozkien ardurak bere gain hartzea. Berehala geldiarazi behar da oposizioko pertsonen, komunikabideen eta salaketa eskubidea nahiz eskubideen errespetua aldarrikatzen duten erakundeen jazarpena. Nazioarteko komunitateak estu hartu behar du Nikaraguako Gobernua, Erdialdeko Amerikako herri hark bizi duen une larri honetan.

Horregatik, Espainiako Garapenerako GKEen Koordinakundeak eta lafede.cat erakundeak argitaratutako adierazpenarekin bat eginez, euskal instituzioei gaitzespen irmoa eskatzen diegu, eta adierazpen argia, Nikaraguako egoerari buruz duten iritzia azalduz.

Era berean, egiazko larrialdi politiko, sozial, nahiz humanitarioa erakusten duen testuinguru hartan, nazioarteko elkartasuna ezinbestekoa bilakatu delarik, euskal elkartasun erakundeei dei egiten diegu lagundu eta babes ditzaten nikaraguar herriaren gizarte mugimendua eta bertako erakundeak, giza eskubideen aldekoak, feministak, gazte, nekazari nahiz auzo erakundeak etab.

Argazkia: Voice of America (domeinu publikoa)