- Ondorioak are larriagoak izango dira setio jarraitu baten eta hamarkadetako okupazio etengabe baten inpaktu izugarriak pairatzen ari den biztanleriarentzat. Ustezko bake akordioa gorabehera, genozidioak aurrera jarraitzen du.
- Premiazkoa da nazioarteko komunitateak, Europako Batasunak eta Espainiako Estatuak berehalako neurriak hartzea Israelgo Gobernua presionatzeko; besteak beste, armen merkataritzaren berehalako eta benetako amaiera.
Jatorrizko adierazpena Estatuko Garapenerako Erakundeen Koordinakundearen webgunean.
Garapenerako Erakundeen Koordinakundeak ohartarazi duenez, Israelek Gazan, Zisjordanian eta Jerusalem ekialdean jarduten duten 40 erakunde humanitario ingururi erregistroa kentzeko erabakiak ondorio larriak izango ditu palestinarrentzat. Erakunde horiek urtea hasi eta 60 eguneko epean eten beharko dituzte beren jarduerak, Israelgo Gobernuak ezarritako baldintza batzuk betetzen ez badituzte; besteak beste, Palestinako langileen eta haien familien zerrenda bat entregatzea. Neurri horrek printzipio humanitarioak, langileak zaintzeko betebeharrak eta datuak babesteko nazioarteko arauak urratzen ditu.
Israelgo Gobernuak beste urrats bat eman du laguntza humanitarioaren, bakearen eta giza eskubideen arloan lan egiten duten erakundeei ezarritako neurri murriztaileetan; bereziki, hamarkadetan zehar etengabeko jazarpena jasan duten erakunde palestinarrei.
Nazioarteko GKEek Palestinan egiten dituzten jarduerak bertan behera uzteak ondorio kalkulaezinak ekarriko dizkio egoera humanitario negargarrian dagoen biztanleriari. Gainera, munduko beste leku batzuetan antzeko neurriak hartzeko atea ireki dezakeen aurrekari bat izango da, nazioarteko zuzenbidea eta printzipio humanitarioak are gehiago murriztuz. Su-etena gorabehera, genozidioak aurrera jarraitzen du: 2023ko urritik egindako erasoek 70.000 pertsona baino gehiago hil dituzte, eta laguntza humanitarioa eta zerbitzu funtsezkoenak eskuratzeko blokeoa dago; ondorioz, aurrekaririk gabeko muturreko sufrimendua eragiten ari da.
Eginkizun ordezkaezina
Erakunde humanitarioek Gazako kanpaina-ospitaleen %60 inguru eta ur, saneamendu eta higiene zerbitzu guztien %42 inguru kudeatzen edo babesten dituzte. Nazioarteko GKEen erregistroa bertan behera uzteak hiru osasun-zentrotik bat berehala ixtea ekarriko luke. 2024an, elikadura asistentzia osoaren erdia baino gehiago eman zuten, janari prestatuen banaketa-puntu gehienak eta desnutrizio akutu larria duten haurren tratamendu guztiak barne. Aterpe eta elikagaiak ez diren gaien jarduera guztien ia hiru laurden inplementatu dituzte, eta laguntza psikosoziala eskaini dute.
Zisjordania eta Jerusalem ekialdean ere, lan hau funtsezkoa da Israelgo armadak eta legez kanpoko asentamenduen indarkeriazko hedatzeak gero eta setiatuago dituen herritarren oinarrizko eskubideak bermatzeko. Joan den azaroan, NBEk salatu zuen «erregistroak daudenetik, 2025 urterik bortitzena bihurtu dela Zisjordaniako populazio palestinarrarentzako, Jerusalem ekialdea barne». Indarkeria horrek larriagotu egiten du Israelek hainbat hamarkadatan egin duen apartheid politika, palestinarrak lekualdatuz, zapalduz eta desjabetuz: kolonoen legez kanpoko asentamenduak, etxebizitzak eraistea, azpiegiturak eta laborantza-lurrak kaltetzea, edo errefuxiatuen kanpalekuen aurkako erasoaldiak.
Azken bi urteotan, nazioarteko GKEek —Espainiako Estatukoek barne— beren lan humanitarioari eutsi diote, erasoak, murrizketak eta langileen erailketak —batez ere palestinarrak— gorabehera, ahal izan den laguntza humanitario guztia mantenduz, nazioarteko zuzenbidea defendatuz eta eragin politiko etengabea eginez. Erakunde palestinarrekin eta herritarrekin koordinatuta, Israelgo Gobernuak eragindako giza eskubideen urraketa sistematikoak salatu dituzte, eta herrialdeko zein nazioarteko esparruetan presioa areagotu dute, Nazioarteko Zuzenbide Humanitarioarekiko errespetua, haien lanaren jarraipena, Israelekin armen merkataritza amaitzea eta su-eten iraunkorra bermatzeko.
Premiazko neurriak
Palestinan lan egiten duten Espainiako GKEek Kongresuan 2024an onartutako legez besteko proposamenean (PNL) jasotako eskaerak betetzea exijitzen dute: su-eten iraunkorra, sarbide humanitario nahikoa eta iraunkorra bermatzea, Nazioarteko Zuzenbide Humanitarioa eta giza eskubideak errespetatzea, armen merkataritza amaitzea eta irtenbide negoziatu bat sustatzea.
Palestinako bazkideekin eta nazioarteko gainerako erakunde humanitarioekin batera, ahal den neurrian eta ahal den moduan lanean jarraituko dutela berretsi dute. Beren betebehar humanitarioa gauzatzen eta instantzia politiko guztiak presionatzen jarraituko dute, genozidioaren, su-etenaren urraketa sistematikoaren eta Israelgo Gobernuak laguntza humanitarioaren, bakearen eta giza eskubideen arloan lan egiten duten erakundeen aurka egindako jazarpenaren aurrean neurri irmoak har daitezen. Palestinari laguntzen jarraitzeko eta Espainiako Estatuak zein nazioarteko komunitateak Israelekin armen merkataritza amaitzeko presioa egiten jarraitzeko deia egin diete herritarrei. Ildo horretan, urtarrilaren 31tik otsailaren 1era bitartean Espainiako Estatuan egingo diren mobilizazioetan parte hartzeko deia egin dute.
